af aurum skuluð þið apar verða

Ég er búinn að vera að hlusta á Rás 2 í allan dag og það er allt sjóðbullandi vitlaust þarna. Og engan skal undra því þessi ráðning á nýjum fréttastjóra Útvarpsins er eitthvað meira en lítið vafasöm. Ég skal ekkert um það segja hvort hún er af pólitískum toga en ekki er hún á faglegu nótunum. Sá einstaklingur sem var minnst hæfur í starfið var ráðin, maður sem hefur unnið við fjármálstjórnun síðustu árin. Hvað kemur fjármálastjórnun fjölmiðlum við? Þessi maður var sá eini er meirihluti Útvarpsráðs mælti með og tók það fram að hann hefði staðið sig einkar vel í sínu síðasta starfi. Það má vel vera en hann var ekki að vinna við fjölmiðla heldur bókhald. Þó að maðurinn hafi verið stjórnandi og vilji skipta um starfsvettvang verður hann að byrja á botninum eins og aðrir, hann getur ekki bara byrjað á því að verða stjórnandi á einhverju sviði sem hann hefur enga þekkingu á. Reyndar vann hann við fréttamennsku á Bylgjunni einhvern tíman í afleysingum, en það er engan veginn nóg reynsla fyrir svona starf. Aðeins áralöng reynsla við fjölmiðla ætti að vera fullnægjandi.
Þetta mat meirihluta Útvarpsráðs rímar vel við þróun sem átt hefur sér stað í þjóðfélaginu síðustu ár, þar sem það fólk sem vinnur við að handfjatla peninga er einhvern vegin orðið mikilvægasta fólkið í þjóðfélaginu. Ekki kennarar eða læknar eða ruslakallar (ímyndið ykkur hvað myndi gerast ef ruslakallar færu í verkfall í nokkrar vikur!) heldur verðbréfamiðlarar og bankastjórar. Peningaþekking er orðin dýrmætasta þekkingin í landinu og einhvern veginn það sem stjórnar öllu sem þegnar og ráðamenn þessa lands gera. Hversu kapitalísk erum við orðin? Bókhaldari er hæfasti einstaklingurinn til að verða fréttastjóri miklvægustu fréttastofu landsins. Þetta er rugl! Niður með peningavaldið!